දකුණු පළාතේ මාතර දිස්ත්‍රික්කයේ ගඟබඩ පත්තුවට අයත් වන කඹුරුපිටිය ප්‍රාදේශීය සභා බල ප්‍රදේශය වර්තමානයේ වර්ග කි.මි 60.68 ක භූමි ප්‍රමාණයකින් හා ග්‍රාම නිලධාරී වසම් 39 කින් සමන්විත වන අතර උතුරින් මුලටියන ප්‍රාදේශීය සභා බල ප්‍රදේශයද, දකුණින් තිහගොඩ ප්‍රාදේශීය සභා බල ප්‍රදේශයද, නැගෙනහිරින් කිරින්ද පුහුල්වැල්ල ප්‍රාදේශීය සභා බල ප්‍රදේශයද, බටහිරින් අතුරලිය සහ මාලිම්බඩ ප්‍රාදේශීය සභා සභා බල ප්‍රදේශ වලින් වටවී ඇත.

සොබා දහමේ මහඟු දායාදයක් වන මාස්මුල්ල රක්ෂීත වනාන්තරයෙන් හා කොට්ඨාශයට ආසන්නව පිහිටි වීරකැලේ රක්ෂීතයෙන්ද ප්‍රදේශය ආසන්නයෙන් ගලා යන නිලවලා නදියෙන් හා ඌරුබොක්ක ප්‍රදේශයේ සිට ආරම්භ වී කොට්ඨාශය හරහා ගලා යන එන කිරම ආර අතු ගංගාවේ ජල දහරාවෙන්ද කුඩා ප්‍රමාණයෙන් ප්‍රදේශය පුරා විහිදී යන ඇළ දොළ රාශියකින්ද මෙම ප්‍රදේශය සමන්විත වන අතර, ලේනබටුව හා අල්ලෙවෙල ආදී වැව් ප්‍රදේශයට මායිම්ව පිහිටීම තුලින් සාරවත් වූ කඹුරුපිටි ප්‍රාදේශීය සභා බල ප්‍රදේශය වසර පුරා විහිදෙන වර්ශාපතනයකින් යුක්ත බැවින් වගාවන්ට යෝග්‍ය බිම් ප්‍රදේශයේ කෘෂිකාර්මික කටයුතු වලට මහඟු පිටුවහලක් සපයයි. මානව සම්පතින් 64%කට ආසක්නන පිරිසක් ශ්‍රම බලකායට අයත් වන ප්‍රදේශයේ ජනතාවගෙන් බහුතරයකගේ ප්‍රධාන ජීවනෝපාය කෘෂිකර්මාන්තය වන අතර ඉන් වී ගොවිතැනට ප්‍රමුඛත්වය හිමිවන අතර, කුරුඳු, තේ, පොල් හා රබර් වගාවන් හී නිරත පිරිස් හඳුනා ගත හැකිය.

එමෙන්ම ගාඩාල්, කළුගල්, බ්ලොක් ගල් මෙන්ම බට කර්මාන්තය, මැටි කර්මාන්තය හා මැහුම් කර්මාන්තය යනාදී සුළු කර්මාන්ත හා ස්වයං රැකියා මෙන්ම පාරම්පරික කර්මාන්ත වල නිරත පිරිස්ද ඒ අතර වේ. යෝගට් නිෂ්පාදනය, ජල බෝතල් කිරීම ඇඟළුම් නිෂ්පාදනය කිරීම යනාදී මහා පරිමාණ කර්මාන්ත ශාලා තුනක්ද මෙම ප්‍රදේශයේ ආර්ථිකයට සක්‍රීය දායකත්වයක් සපයයි. එමෙන්ම ලෝකයේ ඇති එකම කුරුඳු පර්යේෂණ ආයතනය මෙන්ම රුහුණු විශ්ව විද්‍යාලයේ කෘෂිකාර්මිකපීඨයද තාක්ෂණ විද්‍යා පීඨයද කඹුරුපිටිය ප්‍රදේශය තුල පිහිටා තිබීමෙන් ජාත්‍යන්තර වශයෙන්ද කීර්තිනායමක් අත්පත් කර ගන්නට මෙම ප්‍රදේශය සමත්වී ඇත.